„Лектирата не е бауч“

Во организација на НУ Библиотека „Григор Прличев“ и Лајонс клубот ДЕНИЦА, се одржа креативниот настан „Лектирата не е бауч“, како мини-промоција на книгата „Читањето не е бауч“ од авторките Љубица Кардалеска-Радојкова, Татјана Срцева-Павловска, Габриела Неделкоска, Сандра Серафимовска и Ана Арсовска – дел од кадарот на АУЕ-ФОН, како и на прирачникот „Лектирата не е бауч“, кој се темели на истражување поврзано со поимот и значењето на лектирата во ерата на дигитализацијата и вештачката интелигенција. Двете изданија веќе се обработени и подготвени за зајмување од страна на нашите читатели. Модератор и креатор на настанот беше доц. д-р Габриела Неделкоска. Заедно со учениците од трета година од СОСУ „Св. Кирил и Методиј“ и нивната професорка по македонски јазик и литература, Марија Стрезовска, беше обработена лектирата „Парите се отепувачка“ од Ристо Крле.

Преку актерска игра, читање и цртежи, учениците уште еднаш се потсетија на суштината, содржината и пораката што ја носи битово-социјалната драма „Парите се отепувачка“ од стружанецот Ристо Крле, создадена врз основа на вистински настан. Настанот беше реализиран во рамки на проектот „За поубав свет“ од Годишната програма за работа на Библиотеката, поддржан од Министерството за култура и туризам.

„Лектирата не е бауч“

Уписи

Студентски живот

Контакт