Средба на претседателот на Комисијата за одбрана и безбедност со студенти од Факултетот за детективи и безбедност на АУЕ – ФОН

Претседателот на Комисијата за одбрана и безбедност (КОБ), пратеникот Павле Арсоски, одржа средба со професори и студенти од Факултетот за детективи и безбедност при Американскиот универзитет на Европа – ФОН. На средбата присуствуваше и пратеничката Ваљбона Адили-Емини, член на Комисијата.
Студентите беа предводени од деканката Татјана А. Балоска, како и од професорите Зунун Зунуни и Јасмина Трајкоска-Наумоска.
Во своето обраќање, пратеникот Арсоски ги запозна студентите со улогата и надлежностите на Собранието, со акцент на прашањата од областа на одбраната и безбедноста. Тој посочи дека донесувањето законски решенија е значајно за зајакнување на стабилноста на државата и безбедноста на граѓаните.
Посебно се осврна на поставеноста и ингеренциите на Комисијата за одбрана и безбедност, како едно од најзначајните собраниски тела во оваа сфера, заедно со Комисијата за надзор на безбедносните служби и Комисијата за следење на комуникациите.
Арсоски ги информира присутните и за актуелните предлог-закони од безбедносната сфера, вклучително и за планираните измени на Законот за безбедност во сообраќајот.
Во текот на дискусијата беше заклучено дека безбедноста е темел на стабилноста на едно општество и дека не се однесува само на прашања од воен или мировен карактер, туку опфаќа и широк спектар на други сегменти чие уредување влијае врз секојдневната сигурност на граѓаните.